廉航大舉進擊，唔少航空公司都要靠機艙銷售賺錢，有內地背景嘅香港航空亦唔例外。港航噚日介紹今年推出嘅一系列空中銷售免稅品，雖然港航嘅機票夠晒平，但賣嘅產品唔平，Gucci都為港航推出獨家產品，應該都係睇中機上一班內地豪客。
港航新近跟全球最大機艙免稅綜合運營商DFASS集團合作，引入過百款產品，如化妝品、首飾、名錶等喺飛機上發售。港航執行副總裁孫劍鋒估計，此舉可以帶動機艙銷售三成以上。
港航亦仿效對手國泰航空（293）提供埋送貨服務，國泰早前推出送貨服務，客戶喺機上或上網訂貨，國泰都可以安排將貨物送到，港航亦推出類似服務，叫「港航SkyShop」。簡言之，港航唔止跟國泰鬥平機票，機上銷售都比拼一餐。