我個人好old school，鍾意嘅日本組合係早在90年代初出道嘅Tokio，而喺Tokio入面就最鍾意有「雙塔」之稱嘅松岡昌宏及長瀨智也。點解佢哋叫雙塔？因為兩個都身高超過1米80囉！加上人又靚仔，絕對高大威猛，而難得嘅係兩個都好有喜劇感，做搞笑戲真係笑死人冇命賠㗎！咁啱得咁蹺，家陣喺英超下游嘅韋斯咸亦打算組雙塔救亡，借得安治陣中身高達2米03嘅前鋒拉仙拿查奧爾（圖），諗住搵佢同傷癒嘅1米91前鋒安祖卡路爾齊齊衝鋒陷陣。
雖然以科特迪瓦前鋒嚟講，23歲嘅拉仙拿查奧爾就唔夠有「非洲版言承旭」之稱嘅杜奧巴咁型，亦冇韋菲特邦尼咁大隻，不過，好彩佢高得嚟都叫做均勻，冇話好似史篤城長人前鋒高治咁一碌竹，而最緊要嘅係佢似乎頭頂腳踢樣樣有，加上佢嘅拍檔安祖卡路爾可以補幫靚仔度上嘅不足，所以呢對「黑白雙塔」都幾叫人期待㗎。
查奧爾登陸英超之後，就會同曼城門將彭迪利蒙雙雙成為英超最高球員，咁英超最矮嘅球員又係邊個呢？原來係得1米60嘅史雲斯後衞美亞迪。文：吾中
以女性角度看球星新聞，唔用眉筆用原子筆寫低球壇百態！