特首發表第二份施政報告，最矚目係將部份社會福利恒常化，又破天荒為在職低收入家庭提供補貼，兩夫婦加兩個子女，合資格每月可攞2,600蚊，藉此鼓勵市民可以自力更生。
大氣候變 百姓為先
佢嘅出發點係好，但福利呢樣嘢開咗頭就覆水難收，加上政府藥石亂投打樓市，庫房收入減少係遲早問題，連同政府福利開支不斷膨脹，千禧年後香港面對嘅結構性赤字危機，睇怕遲早捲土重來。
事實上，呢個情況唔係香港獨有，自金融海嘯後，華爾街嘅貪婪成為眾矢之的，資本家形象盡失，貧富懸殊加劇，連教宗方濟各亦睇唔過眼，開口批評資本主義。高盛資產管理前主席奧尼爾，日前接受公仔箱訪問時，覺得大氣候開始轉變，有迹象各國將會透過稅收或最低工資等政策，幫返啲老百姓，收入可能出現重新分配。
而學術界呢，以斯蒂格利茨為首嘅七位諾貝爾經濟學獎得主，近日就與數十位行家聯署，要求美國政府提高最低工資。法國總統奧朗德又磨刀霍霍，要向有錢人抽重稅，反映「公平」抬頭、效率失勢，但咁做是否合符社會整體利益，其實係價值觀問題，即係難有定論。
閒話講完，講返個市，美元本周走勢先軟後強，上周五公佈嘅非農職位報告奇差，12月新增職位僅7.4萬個，跟市場預期嘅20萬份差好遠，市場認為聯儲局冇條件加快退市，拖累美元連跌兩日，澳元周一曾見90.87美仙，美金兌日圓則撻落102.85。不過，之後美國製造業數據理想，加上幾位聯儲銀行行長繼續撐退市，美金呢幾日又轉強，澳元同加元兩隻有減息壓力嘅商品貨幣就最慘情。
同病相憐 加元快見1.1
澳元周一難得重上90美仙，原本係威係勢，但其後內地新增貸款差過預期，好快就跌返落89美仙，加上噚日公佈上月流失2.26萬個職位，同市場估計增加1萬有好大落差，市場唯恐澳洲要再減息，澳元噚日曾重挫近1.5%，跌到87.77美仙嘅三年半低位。息口趨勢背馳繼續發揮威力，「持力奇俠」紐元兌澳元升到0.9463，創八年新高。
澳洲儲備銀行去年8月將利率降到2.5厘歷史新低後，市場原本以為再減機會唔大，就算噚日就業報告出爐後，市場認為機會率不足四成，但數據差影響下，澳元短期仍有壓力。不過，澳元息口始終同美國有距離，下跌空間應該有限，會否落到澳洲央行樂見嘅85美仙，還看中國經濟。都係嗰句，澳元直盤估計在87至90美仙上落，紐元兌澳元交叉可繼續持有。至於上周睇淡嘅加元就繼續受壓，前晚一度跌至1.0992兌1美元，再創四年新低，1.1關口應該好快失守，有冇轉機視乎加拿大央行下周議息後點講。
奇兵
本欄逢周五刊登