有冇發覺，呢排無綫新聞部嘅主播記者消減咗？咪以為佢哋約埋齊齊去跳鄭多燕，查實係痾嘔肚痛搞到食不下咽就真。其中一位關鍵人物彭國柱就喺facebook貼咗一段虛擬新聞稿，大爆TVB新聞部集體食物中毒嘅「獨家新聞」。
原來一班無綫現役同前記者主播，上周五約埋去土瓜灣一個單位BBQ當擺入伙酒，期間大擦鮑魚、魚、蝦、蜆同羊架等美味食品同海鮮。點知多達一打人，喺事後一日陸續出現肚瀉、頭痛同神情呆滯，八方聽聞最嚴重嗰位中招者，仲要CALL白車入院留醫！
好多現役TVB記者主播呢幾日都先後攞病假休息。有現場目擊人士重組案情，相信佢哋係冇聽衞生防護中心呼籲，進食咗未經煮熟嘅海產所致。
大家係咪好關心，邊啲人痾到七彩咁陰功豬？「爆料人」彭國柱當然走唔甩，據聞吳璟儁、羅若安、何文雯、林子豪同鄭詩亭，都好可憐咁難逃一劫。