狼英新施政報告標題「讓年青的 各展所長」，俾文化人鄧小樺踢爆寫錯字，話只有年輕或青年，係冇「年青」。噚日教育局吳得掂同民政事務局曾德成一齊講新政策，就俾記者問起用「年青」係咪錯。吳得掂唔敢答，做過《大公報》總編輯嘅德成局長話：「你（記者）係啱嘅，應該係用年輕。仲有喎，我真係同行政長官都傾過呢個文字上面嘅事情，佢亦都知道係用年輕……佢亦都覺得大家接受，佢唔係好着緊呢樣事。」唔知係咪講大咗，其後再被追問幾時同狼英講過用錯字，德成局長就連環食螺絲：「我哋……呢個……我同行政長……寫吓花絮好嘅，因為呢個施政報告真係……內容係……內容係好……點呢，好多呀，又……又相當嚴肅。我同行政長官討論呢個年輕、還是年青，就唔係喺呢一頁紙、呢幾句……而係另一個……另一個場合上面討論到，就大家講到話年輕，嗰邊就年長，其實咁樣對嘅，應該講就講青年，佢亦都覺得咁樣約定俗成，大家都接受咗囉。」