費格遜臨退休前講過，話𠵱家嘅班底係奪冠陣容，所以佢可以安心退休，呢番說話真係𠱁死曼迷，仲呃埋莫耶斯落叠。的確，曼聯呢套係奪冠陣容，但佢老人家可能冇為意，呢個陣容嘅核心係佢自己。
加利尼維利曾經講過，喺聯賽爭霸入面，費格遜嘅作用值10分，相信呢個數只少不多。問心，曼聯近兩季個陣都問題多多，後防成班老將，個個走下坡，新人接唔到班，中場更係千瘡百孔，係得卡域克睇得吓，翼鋒就各有各缺點，係前鋒叫係頂級。相比曼城同車路士，費格遜留畀莫耶斯嘅係爛攤子。
小弟認為費格遜錯過咗重建曼聯嘅最佳時間，就係史高斯退役又復出嗰季。嗰時已經明顯見到曼聯中場唔掂，而費格遜嘅方法唔係買人，又唔用保羅普巴，而係叫史高斯出山，呢個根本係治標唔治本嘅辦法！結果，中場問題就好似一個損咗嘅傷口，你一直唔理佢，𠵱家發炎含膿，唔知點收科。
另外，曼聯董事局好似睇輕咗今季嘅變動，行政總裁基爾同領隊費格遜一齊離開，由活華特同莫耶斯頂上。同一時間，兩個咁重要嘅位置都換人，曼聯董事局係咪應該挽留其中一個多一季呢？就算佢兩個堅決要今季走，球會又有冇採取應變措施？例如叫莫耶斯提早啲返工。結果喺兩個新手主持下，曼聯舊年夏天嘅轉會操作，非常失敗。文：咖喱