西九新動力主席梁美芬噚日現身法庭，原來副主席梁偉權喺2011年參加區議會選舉時，未得到58個組織或個人嘅書面同意，就喺選舉廣告刊登呢啲組織同人哋個名，話佢哋支持自己。梁偉權承認違反《選舉條例》，搵咗梁美芬同李慧琼寫信求情。鼠王芬唔單止寫信讚副主席工作熱誠，仲親自到法庭同佢打氣。回帶記得佢兩年前都試過幫個黑幫高層寫求情信，讚個高層「積極參與社會事務」，點知俾裁判官揶揄，窒佢寫漏個「黑」字。梁偉權代表律師清洪話佢只係技術犯規，唔涉及貪污成份，更翻泛民舊賬，話民主黨黃成智參選2008年立法會時自稱「社會工作者」，黃當時未有到社工註冊局續牌，但最後都冇俾人告。