大美人關之琳（之之）、周汶錡、薛芷倫等前晚現身灣仔會展，出席Moiselle時裝騷，奧運體操靚仔運動員阮馬素亦有現身。本身已有五呎九吋高的周汶錡穿起高踭鞋近六呎，巨人上身，阮馬素拍住她影合照時，猶如小矮人身形，相映成趣。
之之身穿白色透視連身裙出席，在日前貿發局騷令眾多女星集體走光的「蠱惑的鏡」位置影相時，她表示：「吓，係咩？我有聽過，但唔知乜事。」問到她曾試過類似走光事件嗎？她表示：「自己平時就好小心，係以前做劉德華演唱會嘉賓時，試過唔小心企咗個風口位，條短裙吹到上塊面度，當時華仔儍笑，我就『吖……』咁嗌。」
記者笑言之之似瑪麗蓮夢露，之之笑言：「夢露就靚啫……當時我着緊波褲，因為臨時拉伕做嘉賓，唔知個位會咁，當時觀眾冇笑。」之之表示若當日在場，亦會避開反光鏡：「最緊要內外都要靚，即使着底底都要靚嘅，因為有時跌倒都可能會走光。」
關心妍考慮人工受孕
之之透露農曆年會和朋友到凍的地方度歲，不過未有表示男友是否同行。此外，關心妍透露夫婦二人為生BB已十分努力，更表示會考慮人工受孕：「有祈禱同問牧師意見，牧師話OK，對於基督徒人工受孕都可以。」
採訪：盧妹
攝影：陳順禎