北大青鳥（8095）又快派2013年成績單，買佢炒盈喜。
北大青鳥主打業務是祖國的消防設備製銷，單係上年的首三季純利，已經翻過半番到1.1億銀，兼係2012年度全年純利4,000萬銀嘅2.8倍！而2013年度嘅成績單，肯定靚仔到爆。係咁易當集團全年度純利1.4億銀，PE由家陣23倍，跌到得番6.6倍。
場內同行，上海青浦消防（8115）預測PE 14倍，祖國上市天廣消防，貼近30倍。北大青鳥現價（0.78元）翻一番，PE都仲未追到行家。
博翻一番睇1.56元
又家陣場內包括保利（119 )、中海外（688）、恒大（3333）、萬科等幾大龍頭內房企業，土儲超過1.4億平方米。據CRIC統計調查，包括呢幾家龍頭五大房企，土儲銷售消化周期3.5至7.4年，處喺合理水平。
咁睇，尤其大城市，對房住有剛性需求，又單係上邊龍頭土儲，足夠三五七年玩。再加埋自貿區逐步確立，商廈需求，亦唔慌細，對好似消防設備呢類配套商，自然得益。
北大青鳥繼續肥仔水，本年度PE，有權再跌到更低水位。
北大青鳥點止PE吸引，而集團PB僅得0.74倍，上邊清浦消防及天廣消防，PB全部係兩倍過外。再講，北大青鳥家陣NAV1.05元，仲係未反映集團計劃今年頭，分拆消防設備到祖國上市，所帶嚟嘅漲爆增值。消防設備一成功登陸A股，北大青鳥PB，隨時跌到得番0.4倍，平到爆。
北大青鳥由11月1蚊調整，一路兜圓底，似醞釀爆炸式上升，相信盈喜係「藥引」，博翻一番到1.56元，PE仲係得12倍。
錢雋
細價股專家
本欄逢周二、五刊出