修咸頓主席哥迪斯憤然請辭，領隊普捷天奴分分鐘一齊執包袱，射手列基林拔勢被賣走，一支今季踢得咁好嘅球隊點解忽然咁大鑊？冰封三尺，非一日之寒，由老班主馬加斯利比喺2010年去世開始，已經注定修頓今日嘅結局。因為馬加斯利比個女嘉菲蓮娜唔想搞波，早就想將修頓賣盤。
老班主馬加斯利比喺2009年收購咗瀕臨破產嘅修頓，幫球會度過難關，仲搵咗意大利銀行家哥迪斯做主席，希望一齊搞好隊波。點知出師未捷，馬加斯利比就喺2010年8月逝世，球會由佢個女嘉菲蓮娜接手。嘉菲蓮娜啱啱上位，唔敢有大動作，咩都聽晒哥迪斯呢位「諸葛亮」話。哥迪斯的確有料到，幫修頓連升兩級，由英甲打上英超。
主席被削權冇癮走頭
當修頓升上英超後，嘉菲蓮娜亦企穩陣腳，開始佢嘅計劃。利比家族係世界上其中一間最大嘅建築器材生產商，估計成個家族有30億鎊（約380億港元）身家。嘉菲蓮娜本身對足球冇興趣，又見修頓唔多賺錢，所以盛傳佢唔想再發展落去，提議賣走陣中球星換錢，甚至將球會賣盤。哥迪斯見到嘉菲蓮娜想破壞自己嘅心血，當然反對。因為呢件事，哥迪斯同嘉菲蓮娜關係破裂。
老闆兼任主席即賣林拔
但講到尾，修頓都係嘉菲蓮娜嘅，哥迪斯只不過打份工；既然無力改變老闆嘅想法，哥迪斯惟有辭職。據報，哥迪斯喺去年夏天已經想請辭，但因為對球會有感情，加埋領隊普捷天奴話，要走就一齊走，搞到哥迪斯繼續留喺球會。不過，去年年底嘉菲蓮娜想削減哥迪斯嘅權力，哥迪斯終於頂唔順，決定走人。
目前喺英超排第9嘅修頓，周三發表聲明證實哥迪斯已經請辭，嘉菲蓮娜暫時兼任主席。領隊普捷天奴好想同哥迪斯共同進退，但被哥迪斯勸阻，但相信普捷天奴最多教到季尾。哥迪斯辭職嘅消息傳出後，普捷天奴成為下位離任英超領隊大熱，但周四有報道指，普捷天奴同嘉菲蓮娜傾完後，願意留隊。據報嘉菲蓮娜逼走哥迪斯後，開始郁修頓球員，有傳佢會將射手列基林拔賣畀韋斯咸，收番700萬鎊。另外，勞基梳爾同洛夫雲就喺twitter度答謝前主席哥迪斯。隊波亂到咁，周六早場作客新特蘭都幾牙煙。