雅虎靚太CEO邁耶（Marissa Mayer）前年年中由Google過檔，冇耐搵舊部狄卡斯楚（Henrique de Castro）過埋去雅虎做營運總監，點知兩年唔夠，狄卡斯楚「被辭職」。有傳話佢做唔到嘢，就算係心腹都冇情講，本周就要拜拜。
雅虎嘅聲明只簡單交代，話狄卡斯楚會離開，邁耶做戲做全套，喺內部電郵同員工講話，呢個係好艱難嘅決定，希望狄卡斯楚未來事業一帆風順。
不過知情人士就爆料，話狄卡斯楚係俾人炒。佢係邁耶上任後第一個請嘅高層，原本希望狄卡斯楚可以幫雅虎扭轉廣告增長頹勢。點知狄卡斯楚遲遲未有表現，後來佢同邁耶開始唔啱嘴形，而且又因為爭權而同多名高層搞到面阻阻。咁多小動作又冇建樹，最後當然係冇得留低啦！