近期新股招股好興搵名人撐場，內地醬油生產商老恒和（2226）噚日就有食評家蔡瀾現身，夾晒佢哋盤生意。蔡瀾話自己係老恒和嘅粉絲，最鍾意佢哋嘅豉油同腐乳，不過佢似乎只係知道對方嘅產品，上市呢類財經嘢就冇乜概念，反問華華一手新股入場費要幾多錢。
老恒和呢間百年老店，創立於清朝咸豐年代，最出名玫瑰腐乳，𠵱家就主力生產米酒同醬料。噚日招股記者會下午四點半先開始，蔡瀾四點左右就到場，後來又上台企喺管理層中間合照，唔講真係會誤會係蔡瀾嘅公司準備上市。
蔡瀾話，佢食咗老恒和好多年，最鍾意佢哋嘅豉油同腐乳，貪佢味道夠香而且持久。不過，佢就唔多清楚公司嘅招股情況，華華提醒佢一手大約3,000幾蚊，佢就笑笑口話「都可以買少少」。