【維基開台倒數166日】不少藝人會接拍港台劇集，港視實力派演員林文龍和艾威，一直因檔期問題未能演出，趁着港視真空期，港台監製夏桂昌即向他們招手，促成合作拍攝以南丫島海難為背景劇集，從醫護人員角度去了解香港遇上突發事件時，所面對的問題和心情。
林文龍在港台新劇《醫護人生》單元故事《活在當下》中，飾演急症室醫生，他搶救一名小孩不果，回家面對女兒，百感交集，有種說不出的無奈和感慨，文龍說：「都十幾年冇同港台拍嘢，今次係同醫管局合作，如果可以盡一分力，配合件事，我可以盡力，同埋呢個係幾震撼嘅真人真事，我睇完劇本同真係呢個角色醫生見面傾過偈，理解成件事，講番當晚真實情況出嚟，係好感觸，希望可以將嗰晚真實情況喺呢一集20分鐘騷畀觀眾睇。」
懷疑港府
劇中的小演員五歲，跟林文龍的女兒林天若相若，文龍說起女兒即笑不攏嘴，他憶述返工出門口前一刻：「老婆（郭可盈）叫我老公，佢（囡囡）聽到我老婆叫，佢話佢又要叫，今朝出門口，佢話老公你返工喇！跟住我老婆話咁你返工老公，個女又話嗰個係我老公唔係你老公呀！咁天真，開心嘢，用錢買唔到！」
另邊廂，艾威憶述當日得悉海難發生時，感覺是難以置信，他再一次對政府感懷疑：「發生呢件事都係幾荒謬，睇得出我哋政府架構存在住好多要改進嘅嘢，首先整件事追究責任問題仲未搞掂，事隔咁耐，由點解到有呢件事件發生，係要嚴加追究，冇可能發生喺今時今日社會。」
採訪、攝影：楊潔雯、魯萍
