N年前，草蜢有句歌詞：「一起森巴舞，彈開不滿」；香港羽毛球雙打「辣妹」謝影雪，對上一次威風過，已是2012年歷史性奪日本超級賽女雙金牌一事。這一年零四個月間，「辣妹」變得氣餒，所以新年伊始，剪短了頭髮、穿上拉丁性感舞衣大跳森巴舞，作為羽球的輔助練習，希望尋求突破。
記者：徐嘉華
攝影：王子俊
多得阿雪的靚家姐謝影彤有位拉丁舞教練男友陳國亨，去年暑假兩姊妹開始學拉丁舞，拍照那天，是二人第一次着上性感舞衣。22歲、愛吃辣的阿雪說：「條裙真係好暴露，我咁大個女第一次着，我唔介意舞裙咁樣，但嫌自己過肥，希望以後多啲跳舞，可以收身，又幫到我打羽毛球啦！」
拉丁舞分5類：森巴舞（Samba）、查查查（Cha-Cha-Cha）、倫巴舞（Rumba）、鬥牛舞（Paso）及牛仔舞（Jive），阿雪暫時只學了數小時，對拉丁舞只懂皮毛，她已計劃每星期學習一兩天，更選了以下3款舞作為此刻自己的寫照。
加強打波節奏感
森巴舞（特點是輕快、熱鬧及激昂，步法婀娜多姿）
「我小學一年級學過一個月芭蕾舞，當時教我嘅老師好惡，我怕咗佢就唔學；近年一直冇跳過舞，連去ball都未試過，節奏感麻麻，因為我無論出戰女雙或混雙都硬橋硬馬；以前才叔（前港隊總教練陳智才）曾建議羽毛球選手要學啲舞蹈，有助打羽毛球節奏感外，仲可以加強身體柔軟度。試過拉丁舞後，發現有啲細微動作好少打波時做，好似踢腿、擺腰同扭臀，呢啲我都做得好生硬，仍要時間適應。」
換拍檔求進步
查查查（給人活潑、熱情及俏皮的感覺）
「無論是打波或者性格，我都偏向活潑、開朗，同潘樂恩2010年開始合作雙打，2012年9月日本賽奪得我哋第一個、又係香港羽壇首個『超級系列賽』女雙金牌後，信心真係去到高點，但之後我哋換教練，打法同動作都大幅度改變，好似防守練得多變，所以近呢年幾，女雙冇咩成績，令到我信心動搖；喺大馬公開賽，我哋會暫時拆夥，我改配女單陳祉嘉，試試會唔會有唔同效果。」雖然阿雪上周與陳潤龍合作奪南韓超級賽混雙銅牌，但她昨出戰大馬公開賽的女雙（拍陳祉嘉）及混雙賽（拍陳潤龍）首圈，都以0:2敗給種籽組合而出局。
望雙線發展
鬥牛舞（舞風雄壯，是自信及驕傲的表達）
「我都算幾女仔，但打波我絕對想畀人『威武』嘅感覺，尤其是混雙，女球手好多時俾對方啲男球手『兇』，所以每次比賽都提醒自己要保持一個唔怕對手嘅氣勢，好似上周南韓公開賽8強，對世界第5嘅英國組合時，我克服被『兇』而贏波（最後奪混雙銅牌），未來我希望女雙、混雙雙線發展，前者想重返世界第9，混雙同拍檔仍在磨合，期望盡快打入頭20位內。」
場地提供：2012舞動全城 拉丁舞教練：陳國亨
後記：姊妹情深
阿雪透露如沒有家姐支持，自己未必有今天：「家姐犧牲好多時間畀我，小學開始，媽咪要四處帶我訓練同比賽，冇時間陪佢（大阿雪4歲），但佢冇埋怨過；到𠵱家我成日要出外比賽，爸爸又喺大陸做嘢，家姐又會抽好多時間陪媽咪，令我可以專心打波，真係好感謝佢。」本身是美容纖體師的影彤，坦言是妹妹的忠實粉絲，可真姊妹情深。