對於近日個別新股炒到風生水起，有芬佬朋友感到嘖嘖稱奇。如那隻經營童裝「紅孩兒」嘅新股米格國際（1247），據講在國際路演開展初段，一直乏人問津，反應非常冷淡；直到公開發售開波，孖展唔知點解爆到七彩，先嚇到一班機構投資者返轉頭認購，以免錯過炒一轉嘅機會。呢啲典型由retail driven、帶動番國際配售嘅新股，以前都見唔少，最著名當然有二手名牌股米蘭站（1150）。最後結果如何？大家有眼見，不用海迪多描述了。
撇開非理性嘅供求問題，海迪睇唔出米格有任何基本因素，值得投資者垂青。首先佢冇自己舖頭，全靠分銷商開店，咁點監察渠道存貨水平？公司聲稱會「每月去分銷商巡視」，要「分銷商提交存貨報告」。即係連POS（point of sale）系統都冇裝？容乜易好似當年體育股咁，賣過龍然後爆煲？
米格在2011及2012年，應收賬款按年急升136%及75%；2012年公司做咗5.2億元（人仔．下同）生意，同期應收賬款就已經達2億。而米格在2010至2012年這三年來，年年賺7,500萬至1.2億元；但你睇經營現金流，首兩年係淨流出，最後一年亦只流入1,500萬元。
呢啲故事似曾相識。芬佬朋友推測，米格四日內會跌穿招股價。希望我們估中個開頭，估唔中個結尾啦。
海迪