或許新股Magnum（2080）的故事實在太有娛樂性，令不少人用「貪得意」的心態認購，公開超購倍數相信有機會超越2011年的米蘭站（1150）的2,200倍。是次Magnum公開發售僅預留840萬股，稍後肯定需要回撥公開發售股份至4,200萬股，以2,000股一手計算，只有2.1萬手撥予公開招股。
假設是次總公開認購人數與米蘭站的9.6萬人相若，即每4.6名認購散戶爭奪一手Magnum股份，僧多粥少的程度，實在令人驚訝。
餐飲業旺 手信成增長引擎
除非閣下相信阿里巴巴今年能夠上市，否則Magnum應可成為今次狂潮的焦點股。而回顧千禧年3月的焦點新股tom.com的誕生，同月科網股狂潮亦步入終結。而2011年5月米蘭站的出現，8月便迎來歐債危機。焦點股往往象徵熱潮高峯，的確有點令人感到不安，但不安不代表不炒股，定好止賺，相信是最佳的防守。
新股旺爆，個別板塊又何嘗不是？彩票、物流、環保、醫藥股輪流喪炒，相信好快又會還原基本步，由濠賭股領軍。不過，就算話你知濠賭股仲有得升，相信好多人都因為畏高而卻步，所以今日推介一隻平靚正的另類濠賭概念股──佳景集團（703）。
佳景主要在澳門經營餐飲及食物手信業務，另有染指投資物業。先講餐飲，種類包括日式、中式、西式餐廳共25間，兩個美食廣場櫃台及三間飯堂，另經營工業餐飲及食品批股，一句講晒︰包羅萬有。
去年第三季營業額按年增長17%至1.86億元，按季計亦升12%，增長勢頭持續。集團剛向澳門貿易投資促進局，提交於橫琴大搞美食廣場的投資建議，期望可容納100家餐廳及食品手信商店，總建築面積達14萬平方米，勢將成為澳門、橫琴及珠海旅客必去的旅遊景點。一旦成事，盈利肯定將會以幾何級數增長。
食物手信方面，佳景早前購入老牌手信澳門英記餅家商標，更邀得譚詠麟做代言人，俞亮唔少朋友試過英記杏仁餅，個個讚不絕口。有校長助陣宣傳，要搞得有聲有色話都冇咁易，隨時可以挑戰鉅記獨大地位，係未來盈利增長的重大引擎。
再講投資業務，佳景在強國人必到的大三巴附近，有一楝投資物業，剛有新租客願意畀貴一倍租金進駐，令集團每年租金收入大大增加至近3,000萬元，又係一隻會生金蛋的鵝。
佳景咁多優點，但原來估值一點也不貴，現價（4.93元）市盈率11倍，保守估計盈利增長兩成，屆時又會回落至10倍樓下，比起同業翠華（1314）的47倍大幅折讓八成，集咁多憧憬於一身，今年股價坐六望七，都應該冇走雞！
俞亮
本欄逢周四刊登