美國消費市道大復蘇，據探子消息，於聖誕節前，玩具反斗城、Walmart、亞馬遜等銷售平台，彩星玩具（869）產品已被「掃清板」，加埋網購大旺，減價都唔使，可見有幾好景！昨日收市出埋盈喜，唔少戰友fb問睇幾錢，魏力重申本月2日推介時的目標價：5.9元，即仲有31%水位，但這肯定不是「終極價」。
另一隻想講係寶威（024），12月30日推介時0.54元，昨收0.65元，累漲兩成。有戰友呻坐到好悶，但賺錢從來不附送娛樂的，想「新奇好玩又刺激」，都係買出奇蛋好了，耐心才是致勝之道。
新能源係今年焦點之一，早排推過隻金風（2208），但魏力發現短線計，國電科環（1296）水位仲多，皆因其爆升藥引齊晒，昨日開始點火，起飛在望，目標：3.5元。
食大茶飯，要揀業績谷底翻身股，去年上半年，國電科環賺1.7億人仔，倒退34%，每股盈利2.8分，見晒底。彭博綜合預測，全年EPS為11.2分，即下半年賺8.4分，係上半年兩倍。今年預測再增54%，淨睇潛力，國電科環贏晒！
再睇業務，主打環保（包括污水及處理、脫硫、脫硝）及風電發電機組，前者受惠國策扶持，後者行業處復蘇階段，勢成基金大炒藉口。估值上，今年預測PE僅10倍，昨見中外資基金大盤狂掃，睇升五成絕不為過。
魏力
http://www.facebook.com/2012jason