梁振英在施政報告記者會遭傳媒質問標準工時失蹤一事，佢答：「我唔提唔代表唔做」。真係人都癲，triple negative句式，擺明又玩語言偽術。
今次施政報告涉及經常開支超過二百億，表面睇係人心工程，拉攏基層，提振民望，而內裏也反映到處梁振英式民粹主義底蘊。究竟大幅增加經常開支派錢畀基層及新移民，係咪真係可以解決長期積存問題，答案係NO。低收入在職援助可以令人脫貧？儍的嗎？
而家政府關愛基金已經亂派，連非法工廈劏房戶都派，又派N無津貼，貧窮戶只會有增無減，越扶越貧。經濟發展動力冇咗，窮人越多，加上每日一百五十個由內地移居人士，貧困戶佔多數，點起公屋、點派福利都唔會夠，林鄭一句人口無上限，加上無法取回單程證審批權，貧窮問題越積越大，放幾多錢落去都冇用。
解決長期積累問題，係要用公共政策，而唔係用長期經常派錢方式。曾蔭權用四年時間去完成最低工資立法，處理在職貧窮，如果對症下藥，跟手應該做標準工時。梁捨難行易，慷納稅人之慨，標準工時因社會有分歧，佢自知冇能力凝聚共識，所以一味死拖，用上我唔提唔代表唔做等「無賴」式回應，可見佢完全係冇決心。
另一個徹底解決老人生活保障方法，同樣唔係派錢，而係做好全民退休保障。曾經俾何喜華等人批評只用短期派錢方式冇用，梁振英仲大鑊，用長期派錢方式。去解決一個結構性貧窮問題，你話納稅階層幾大鑊，此門一開，政客會不斷將金額向上調，以收買人心，尤其有野心去馬2017年選舉之政客，定必加碼又加碼去收買人心。
經常開支只會越派越多
梁振英政府陷入管治危機，民望長期在失敗與拙劣之間徘徊，政客救命，只好藥石亂投，不惜大舉擴張經常開支，將來政府公共財政赤字危機，加稅危機，係將來嘅事。
經常開支項目一開始，就冇得收，只有越派越多。梁振英破壞力，似乎仲未完全呈現，再加上一個變身民粹政客嘅林鄭月娥，香港公共財政危機好快會降臨。
難怪之前鬍鬚曾要成立future fund，鎖死財政盈餘用途，儲定筆錢。梁振英與林鄭聯手長期開倉派米，要幾狼有幾狼，財政司司長點鬥得過！
添馬男