熱火蟬聯NBA總冠軍，當然又可以再見總統嘞！大軍趁作客巫師之前，周二就到白宮見奧巴馬，不過比起上年首次見奧巴馬，熱火前鋒勒邦占士心情已經冇咁激動，難得奧巴馬仲好風趣咁講：「我仲以為大帝會好似同中圈射入波嗰個球迷瘋狂擁抱咁，嚟同我攬埋一嚿㖭。」身為公牛球迷嘅奧巴馬，仲祝福熱火喺餘下比賽繼續有好表現，但對公牛就例外。
奧巴馬教獲迪婚姻之道
總統雖然貴人事忙，但似乎對熱火眾將嘅消息都好靈通；好似熱火後衞獲迪早前求婚成功，不過再被爆有私生子，獲迪事後就自爆，奧巴馬教咗佢幾招點樣維繫婚姻，當然佢就唔會喺公開場合講出嚟。大合照時奧巴馬仲講笑話，一眾隊友好快手擺好姿勢，唔係後衞查米斯又要捱鬧，因為早前有傳查米斯俾勒邦占士等大佬針對，有乜問題都被視為罪人而要捱鬧。
大帝少出手「妒忌」KD
另外，勒邦占士之前接受《ESPN》訪問時，表示「妒忌」雷霆前鋒杜蘭特（KD）嘅高得分及高投射次數，不過暗示自己係為咗隊友，先至減少出手機會，並自言如果擁有杜蘭特嘅出手次數，單場攞6、70分唔係問題。