高富帥兼名利雙收，作為球員仲有乜好追求？中田英壽當年突然決定退役，原來背後理由係踢波已經不能再「have fun」！
中田英壽當年堪稱日本「藍武士」嘅王牌，98年世界盃雖然3戰全敗，但受到注目嘅中田同年向歐洲出發，落班意大利球隊佩魯賈，其後先後效力羅馬、帕爾馬同費倫天拿，成為㗎仔球員喺意甲賽場嘅巔峯代表。中田於06年突然閃電退役，傷咗不少球迷嘅心，當年只得29歲嘅中田，原來早已看透世情，佢近日對意媒透露：「踢咗咁多年之後，我發現足球變得銅臭味，球會只係為咗賺錢，踢波已經冇晒樂趣。我感到好沮喪，所以29歲就選擇退出。」中田唔單止長相打扮有性格，連對足球都特別有性格！
「無敵是最寂寞」，有樣有身材有名有利有地位又不缺美女嘅中田，到頭來只係想藉足球搵番初衷，佢嘅半生根本就係一部青春熱血日劇。文：呂晨