演藝人協會日前選新會長，觸發黃秋生同陳芷菁罵戰是非，噚日秋生接受商台電話訪問，指當初冇打算做會長，曾志偉多次游說先答應，又批評演協架構有不足之處，佢話：「同佢（曾志偉）講我做會長會大刀闊斧改革，會員審批都唔係𠵱家法律，同埋𠵱家演協架構好似Star East咁，可以用嚟做disco或咖啡室，應該好似漁業會咁，漁業就講番漁業，講農業就唔係嗰樣嘢！」
炮轟陳芷菁
講同陳芷菁嘅爭執，秋生話：「睇晒公司章程，當日上去已問係咪跟會章辦事，佢話係，我咪話咁得喇，根據會章我哋可以即時入會，點知陳芷菁話『我唔同你講呢啲！』我咪話同律師講，律師話可以即時入會，但陳小姐話唔得，唔知點解佢等同法律！」會唔會繼續選會長？佢話有人正式聯絡先考慮，指如果入會程序唔跟章程，點解唔索性由陳芷菁做會長！
邵音音、菁瑋、陳法拉等前晚喺圓方出席《曼德拉：漫漫自由路》首映，音音姐對演協事件都有微言，但前晚好避忌，見記者即匆匆入場，有人叫佢封嘴？佢話：「冇呀。」菁瑋自爆當日去演協被拒諸門外：「我話想申請，負責人問係咪秋生嗰邊。唔知入會係咪要等前輩級溝通咗先，好笑。」同場嘅張同祖撐秋生，話佢資歷足夠領導演協。
撰文：馮仁昭
