指數窄幅上落，板塊炒到飛天，近日本欄推介都有不俗表現︰華彩控股（1371）埋單再升8%，同業御泰（555）更炒高兩成，資金流向彩票股勢頭非常明顯，今年係世界盃年，相關博彩活動肯定旺爆，絕對係逢低吸納嘅好選擇。玩具股彩星玩具（869）兩日進賬15%，收市後一如預期發盈喜，但9RSI已進入超買區，提防出現好消息出貨局面，高追值博率不高，候低吸納更化算。
今日推介海爾電器（1169），原因有三︰第一，阿里巴巴點石成金。海爾旗下日日順物流業務，早前獲阿里巴巴購入股權及換股債，最高持股比例可達34%，另阿里巴巴又購入海爾2%新股。可以預期，阿里巴巴旗下菜鳥網，未來肯定會同日日順有大搞作，協同效應不可小覷。
第二，有分拆概念。海爾舊年首9個月未經審核收入，洗衣機及熱水器129億人仔，物流業務424億人仔，是但一瓣都有條件獨立上市，屆時海爾價值將進一步釋放。
第三，圖表有勢。自阿里巴巴宣佈入股後，海爾一直企穩20蚊樓上，噚日收報22.75元，升3%，成交持續上升之餘，更以陽燭升破10日線，短線動力再增強，一旦突破高位23.45元，隨時一飛沖天，現價買肯定有着數。
唐牛