唔少人成日都話女大十八變，今時今日呢句說話已經唔入流，查實仔大亦都可以十八變。噚日喺高登討論區有巴打開咗個post，攞番chok到街知巷聞嘅謝霆鋒，喺97年推出《一窩瘋》嘅MV，跟住仲喺facebook分享，大把人轉載。
呢首歌最特別嘅地方，見到謝霆鋒好似槍王上身，猛喺度表演佢嘅槍法，兼且仲用雙手轉槍，最搞笑嘅地方，就係霆鋒全程都戴住副黑超，衣着方面仲有啲八両金feel，有唔少網友睇到一半都嗌頂唔順，不過都人有話：「呢個係我睇過最有火嘅霆鋒，多年來佢都好有自己風格，咁嘅動作對佢嚟講冇難度，希望2014演唱會可以睇到佢再演繹！」亦有人話：「就算以當年標準，我都覺得不能接受，我懷疑應該冇播過出街！」
不過，其實霆鋒的確係比人行前一步，事關喺MV裏面嗰啲神乎其技嘅槍法，咁蹺喺10年幾後啲膠劇，都有熟口熟面場面出現過，所以幾時都話地球係圓嘅，轉到咁上下啲嘢又會走返出嚟！
栢芝提人換片
有得謝霆鋒，又點可以冇佢前妻張栢芝，雖然栢芝同兩個囝囝Lucas同Quintus𠵱家喺新加坡生活，但係喺網度經常有佢喺當地嘅生活相，噚日又有人見到栢芝帶住Lucas喺新加坡嘅政府部門出現，佢仲來者不拒咁任影唔嬲，跟住仲主動話抱起人哋嘅BB，大讚可愛兼提埋人哋媽咪話BB要換片，大晒母愛。
場主：守庫
