菲菲早於去年8月Magnum（2080）傳上市時，解構過旗下幾間club嘅「營銷」手法，當日呢篇專欄更錄得過萬hit rate，證明呢間club喺炒友間嘅知名度的確幾高。
Magnum而家可算係club中龍頭，好聽啲就係針對高收入客戶；說穿了就係收得貴。當其他club入場費300至400蚊包2杯嘢飲，Magnum就齋入場收500蚊，但由於其「資產質素」高，偏偏就人流最旺，大時大節更加唔好奢望入到場。
想當年《喜愛夜蒲1》喺Magnum旗下嘅Beijing Club取景，套戲更打入內地，結果令唔少自由行到「北京」夜蒲。菲菲之前行經蘭桂坊時，有身穿Polo攝西褲嘅內地人問路：「怎樣去Beijing？」如果佢唔係拎住旅遊書問，菲菲或者會叫佢去機場。
由於Beijing、Billion等club定價平，加上多自由行，遭唔少蒲精嫌棄；反觀Magnum客人資金實力相對高，自然特別吸客。前兩者業績亦同Magnum差一截。不過聽講《喜愛夜蒲3》都有喺Magnum取景，此構成風險因素。因如果套戲喺內地上到畫，令間club成功於內地走紅，到時龍頭地位就有危機，咁難怪公司已準備開新場Zentral保持蒲友新鮮感。雖然Magnum成新股大熱，但所謂「夜場無真愛」，上市炒高即賺即走，是常識吧？
Fifi
本欄逢周二、四刊出