對沖基金賺錢王祝振駒接受本報專訪，直指炒股唔炒市格局或持續五年。如果從炒作角度看，絕對唔係壞事︰大量資金追逐有限板塊，升幅只會更快更狠，只要揀中概念股，要跑贏大市難度不大。
嚟緊一年有乜推介呢？祝振駒首選彩票股，皆因集濠賭與科網成份於一身，食正新經濟概念。咁啱彩票股華彩控股（1371）噚日出通告，話同中移動（941）有進一步合作，有星級基金睇好，仲要成功升呢，華彩即爆升三成，勢必成為手遊股後新一輪喪炒板塊！
華彩表示，已擴大與中移電子商務合作範圍，將為中移動手機支付全網彩票專區業務平台提供一條龍服務，包括系統建設、軟件開發及推廣等，並會全國性為中移動用戶提供網上、手機、短信等方式嘅彩票購買及資訊服務。中移電子商務隸屬中移動，註冊用戶超過一億，同呢個大碼頭加強合作，華彩前景五個字講晒︰盈利大爆發！中移電子商務更加係營運中移動全網手機支付、手機錢包等業務嘅唯一機構，意味華彩有機會染指網購支付平台業務，概念強到爆燈。
華彩噚日喺7億銀大成交下炒高32%，收報0.66元，就算再升五成到金英目標價1蚊，市值其實都未夠100億銀，只及濠賭科網股零頭，絕對係識於微時嘅好選擇。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange