最近收到一批讀者來郵，今日一併回覆，如果已經遲咗，請見諒。一位讀者附上真姓名，講明係洗衣街舊樓住客朱先生，左丁山諗咗一輪，依稀記得呢位讀者係包租公嘅第三公子，估唔到在此以文會友，竟然有故人相認，他日有空，要搵番朱先生飲茶。
讀者Richard問：年初六（二月五日）開工沖牛人，究竟對屬牛的人是好是壞。年初六為丁未日，十二地支之中，丑未相沖，丑為牛，故此話沖牛人。沖就是不好，牛人可避則避。年初六早上出去時，由早上九時至下午三時皆吉，適宜返工。
讀者Dennis要求解釋馬年方位（本欄12月19日）關於北方及東北一段。得Dennis提醒，翻閱原文，再與傅會長之談話筆記比對，發覺有錯漏，應該改正為：「可在向東北方位放置直身綠色瓶養三枝富貴竹，向北方位則放置石灣公仔黃色瓦牛。」多謝Dennis查問解釋。佢又問及傅會長對馬年運勢之見解，因左丁山雜事繁多，冇乜時間跟進，好彩朋友余樂天亦對傅會長有此一問，將傅會長嘅馬年運勢所見寫出嚟（經濟日報一月十日）。
據傅會長講，2014年2月4日立春後便是甲午年，甲為樹木，午為丁火，木生火，即上層生下層，老闆生下屬之意，下級最好唔同上級頂頸對着幹。甲木屬東方，今年中國環境甚佳，國勢趨強，會是國際經濟火車頭，麻煩不是沒有，甲午年令人想起1894甲午戰爭，現在安倍晉三好想修改日本憲法，親拜靖國神社，刺激中國，雖不致再有甲午戰爭，但中日關係不佳，影響中日貿易旅遊，總是有的。傅會長提醒要注意農曆正月（2月4日至3月6日，丙寅月），農曆五月（庚午月），九月（甲戌月），呢三月個份特別好，困難月份有農曆八月（癸酉月）與十一月（丙子月），呢兩個月中國可能有領導人局部變動。
一位相熟讀者來電問：「近日明報高層有相片在報紙頭版出現，我發覺所有見過嘅張曉卿相片，佢都係打綠色領呔，係唔係特別吉利嘅呢？」綠色是否吉利，唔識，唔敢講，不過張曉卿做木材發達，公司叫做「常青」，綠色代表木之顏色，佢本人生於1935乙亥年，天干係陰木（乙），地支係水（亥），內含壬水、甲木，雖然唔知佢八字，想必與木有緣，報紙亦屬木，故此佢與綠色領帶不離不棄，大概係此原因。