儘管內地接連出招打壓虛擬貨幣Bitcoin炒風，本地財金官員又勸市民莫盲炒，Bitcoin炒風依然未退。噚日八達通CEO張耀堂一句話，唔排除可以用Bitcoin增值八達通，即刻觸動金管局助理總裁李建英嘅神經，一輪嘴反擊。
話說噚日亞洲金融論壇其中一個環節，未夠40歲嘅金融顧問公司創辦人Zennon Kapron話希望以後可以用Bitcoin交銀行費用，主持人隨即問今年3月退休嘅張耀堂，幾時可以用Bitcoin增值八達通，對方就話唔排除呢個可能。
雖然大家不以為然，但金管局助理總裁李建英就好在意，佢先加強語氣，重申界定貨幣嘅時候，一定要有名義價值，同埋有一個可靠嘅發行人，Bitcoin「完全滿足唔到」呢啲要求。之後仲加多句，話呢啲知識喺經濟學入門書已經睇到。其實李總唔使咁大反應，雖然張耀堂話唔排除呢個可能啫，但佢仲有話，𠵱家Bitcoin只可以話係投資產品，至少等到大部份網上交易都承認Bitcoin，八達通先會考慮接受Bitcoin增值。
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24