每年一度嘅亞洲金融論壇邀請外國財金官員來港參加，財爺曾俊華當然要一盡地主之誼，據聞財爺前晚在家宴請杜拜金融服務局主席Saeb Eigner同其他嘉賓，一圍十人，七餸一湯，不過就冇白飯任裝。
據聞，財爺前晚在家設宴，心情相當輕鬆，脫下西裝，穿上打功夫時着嘅深藍色唐裝，等待來賓時仲聽住爵士音樂，同隻愛犬玩緊，原來佢養咗隻日本柴犬，名叫Oliver，隻狗又乖又聽話，逗得一班來賓非常高興。
嗜打功夫 食得清簡
財爺出名鍾意打功夫，在美國曾學習洪拳，師公嘅師公仲係一代武術宗師黃飛鴻，佢家中收藏好多武術同詠春書籍，呢個大家應該唔感到意外。
講番餐飯，財爺邀請外國財金官員食飯，究竟有乜好餸呢？先唔講國家主席習近平嚴打官員高消費，據聞財爺本身食得簡單，即使宴客，菜單上冇鮑參翅肚，七餸一湯都係家常餸，包括琵琶豆腐、煎牛柳、蟹餅，聽聞仲要全部細細件，好在最後有糯米雞翼，甜品又係糯米整嘅芝麻糖不甩，咁大家就唔使食飯都好滿足嘞。
財爺喺席上都係同大家風花雪月，既然請來杜拜金融服務局主席，當然有講伊斯蘭金融發展，好多年前政府都話要推動伊斯蘭金融，雖然一直冇聲氣，但政府應未死心仲諗住做。
至於下月公佈嘅財政預算案，財爺冇乜點提，但被人問到係咪要跟住CY今日公佈嘅施政報告去做，財爺就冇否認囉。
李華華
mailto:[email protected]
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24