AC剛簽得本田圭佑，本來歡天喜地；豈料周日來個超級反高潮，面對下游升班馬薩斯索羅竟以3:4敗陣。教頭艾基利（圖）終在賽後被炒，其實已經炒遲咗。翻查貝盧斯科尼自86年入主AC以來，27年16位教頭中艾基利只是第5位季中被炒之人。相比皇馬、車仔等，貝老在老細足球中其實已算是有耐性的了；亦反映出艾帥真係唔多掂。
艾基利衰乜？可能係季初轉會策略出錯：例如未能留住主力奇雲保定、花逾千萬歐元買來資質平庸的前鋒馬特尼；又可能戰術唔掂：進攻過份依賴巴洛迪利個人天份，後防更是錯漏百出；亦可能臨場調動能力不足等。總括而言，這位之前只是帶中型班卡利亞里的教頭，看不出有甚麼出眾之處；若非當年國米奪三冠王後不思進取，加上祖記未成氣候，他能否帶領AC奪得10/11球季冠軍實在成疑。其最可取之處，就是在老闆話事的AC中，夠聽話。
艾帥走後，誰是最佳接任人？當然，先說句公道話，近年球會給予艾帥的資源亦很有限：接連有主力離隊唔止，買人亦多等免費或平貨，如卡卡及本田；積弱多年的後防卻久久未有補強，仍倚賴老退的邦利拿、級數有限的干斯坦等。年年削弱的班底，相信連摩佬或費Sir都會頭痕。我看青年軍教頭恩沙基該是接任最好人選：既然球會唔似花錢大搞，不如搵個熟青年軍嘅，起碼可以執幾個後生仔上一隊頂下檔！
方柏翹
now足球評述員
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24