狼英今日發表佢任內第二份施政報告；雖則話係狼英嘅施政報告咋喎，但眾所周知，𠵱家特區政府實際話事人已經係政務司司長林鄭月娥啦！八方聽聞，呢份報告由於有好多嘢涉及林鄭月娥嘅管轄範疇，所以幾乎由林鄭揸莊，好多章節都係佢柯打AO寫，令原本負責施政報告嘅中策組首席顧問左王邵善波，今年齋睇冇份寫！
為顯示權力事事過問
其實邵善波今次被迫靠邊站，對政府嚟講有好處㗎！有知情人士講番上次苦況，話說當時狼英搵咗邵善波撰寫施政報告，結果最後出嚟嘅報告卻係狼英嘅施政宣言，寫埋啲鴻圖大志、虛無嘢，睇到政府中人眼凸凸，結果要由AO重寫咁滯。據聞，當時仲有好多AO喺聖誕假期，要為呢份狼英處男作改頭換面，個個苦不堪言。
時移世易，政府個勢轉晒去林鄭身上，連份施政報告都幾乎開晒林鄭嗰瓣，例如扶貧同青少年等。八方聽聞，林鄭因此揸旗叫AO幫手寫，唔使勞煩到邵善波。由於出自AO手筆，據聞報告第一稿已經好過上次多多聲，冇乜嘢需要改。
忽然由主角變大茄，向來好有權力慾嘅邵善波，又點會甘心被人擺埋一邊？有政界中人話喎，為咗顯示自己嘅權力同地位，邵善波雖然冇份寫咋，但依舊對施政報告事事過問，有傳佢仲要求，報告就算要改粒字，都要畀佢過目、問過佢批准，證明齋睇嘅佢仲好有SAY。
mailto:[email protected]
足本收睇《亂噏24》x卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24