邵逸夫爵士上個禮拜仙遊,我對邵爵士嘅事好多都係上周睇報道先知,睇完令我諗:「如邵逸夫唔係生於1907而係1987,佢會點做?同埋邵逸夫嘅邏輯如果啱,王維基搞香港電視(1137)就會係極錯。」
兩人同樣有遠見
大家睇題仲估我會就咁講TVB(511)對香港電視呢?點會咁簡單,原因係我唔會叫佢做電影或電視人,佢其實係一個資訊科技人。大家要記得,喺電影前,人類接受資訊嘅方法主要靠文字。邵逸夫將電影科技引進到東亞,仲要做第一齣講嘢片、彩色片,要克服嘅技術性挑戰多大?當掌握咗技術,佢就諗分發渠道,而決定開戲院線。要人入戲院又要值,乜內容類別同格式先得,所以開邵氏片場,拍90分鐘至幾個鐘嘅產品,起碼佢冇news crew搞新聞片。由邵逸夫鍾意嘅流水作業sure money,變成大budget高風險嘅big money,玩「淥碗麵畀你食」嘅電視劇合胃口得多。
如佢係簡單嘅電影人,佢唔會畀邵氏片場玩完,唔會喺香港電影票房黃金期賣電影院線,更唔會連片庫都賣埋。佢對科技有前瞻性,見到電影會沒落,所以冇留戀。邵逸夫投資電視,就係因為有呢種前瞻能力。呢幾日係咁諗,如我可以拍到佢第一次悟出「以後家家戶戶都有個電影院喺屋企」呢樣嘢個樣就好啦,相信同Steve Jobs當年遊PARC一樣。就係咁,解釋埋點解佢會喺幾年前賣TVB嘅股份而唔係注落啲信託度,因為又一沒落緊嘅格式。亦令我諗,如佢係個1987年出世嘅人,邵逸夫會點玩互聯網?
講前瞻,另一個有呢個能力嘅人就係王維基。佢當年知長途電話IDD作主要通訊方法會玩完,就好明智咁搞光纖網絡,但點解而家會買落一個邵逸夫覺得會式微嘅行業呢?王維基嘅vision vs邵逸夫嘅遠見,好睇,好睇。
孫柏文
獨立股評人
http://facebook.com/shuen
本欄逢周二刊出
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange