空前絕後嘅電影電視大亨邵逸夫爵士逝世，全城哄動。邵爵士生於1907年11月，逝於2014年1月，足歲係未夠107歲嘅，英文報紙「國際紐約時報」不同於本地報紙，報導邵爵士逝世嘅標題就指佢係106歲。
在清朝末光緒三十三年出生，於21世紀歸天，享壽之長世所罕有，更何況佢在100歲時，還是上市公司主席，係一項世界紀錄，左丁山實在想唔到呢個紀錄以後怎會有人打破之。左丁山有幸與佢見過一次面，就係佢在99歲之時，一個人出席上海總會嘅宴會，好似係特別為佢賀壽嘅，詳情已經唔記得，當日左丁山與邵爵士同坐一席，坐在佢對面，自己係席上最年青一位，因上海總會諸公多高壽，席中人士個個八九十歲，自己無資格發言，此外佢地全部講寧波話、上海話，左丁山一句都聽不懂，不便出聲啦，但以當晚所見，邵爵士談笑甚歡，仲幾好胃口㖭，聽講佢每日吃人參，練氣功，對身體健康好有益喎。
此日在佳寧娜吃午飯，前輩A請客，大家講起邵爵士，賓架R即刻話《星島日報》（一月八日A23版）講邵逸夫、鄒文懷兩人對撼一文，最是準確，分毫不差，因為佢在鄒文懷創辦嘉禾之時，有一手經驗，可以做證人。邵氏電影王國在電懋陸運濤空難之後，獨霸多年，誰知重臣鄒文懷搵埋何冠昌、梁風出走，創辦嘉禾，從此邵氏電影慢慢由高峯滑落，好彩還可轉戰電視圈，奪得無綫控制權，稱雄香港，人生長壽，就有此益處，設或邵爵士二十年前已經不在，本港電視或不會由無綫獨霸嘅。80年代中期以後，糖王郭鶴年曾經入股無綫，原來想法係邵爵士已經七十幾八十歲，始終需要繼承人㗎，點知邵爵士毫無疲態，繼續勇猛，郭氏集團見到入主無綫無望，唯有在1995年左右賣掉無綫股份，取回TVEI（電視企業，旗下有華星、見聞會社、博益出版等）經營權，後來更索性將TVEI拆骨停業，「博益」嘅書本版權從此鎖死咗，可惜之至。至於邵爵士是否全靠食人參練氣功至可以創造高壽奇蹟，前輩N在佳寧娜飯局上話俾我地聽，十幾年前佢當面問過邵爵士呢個問題，邵爵士話佢還有一點非常重要，甚至係最重要嘅，就係朝朝晨早在太陽昇起之前，就在清水灣住宅後樹林漫步最少一小時，吸收新鮮氧氣！