八方一直都好欣賞周融等之流，創立「幫港出聲」反佔中，大大聲發表冇人講得出口嘅「高見」，噚日佢就政改拋出方案，建議任何人只要獲30名提名委員會委員就可成為準候選人，最多可取80張提名票，繼而由千幾人組成嘅提委會，以全票制投三票篩剩三人，篩選後再畀香港人揀，簡稱「3833」方案。再精簡啲，八方建議命名為「三八方案」，形神俱似。
有亞視記者問點解要周融建議搞篩選？周融話，呢個世界一定有篩選，仲反問個記者：「如果唔係有篩選，點解你入ATV做記者？點解唔係入咗係某間報館呢？梗係篩選啦。」
咁點解要篩剩三人畀香港人揀呢？周融話，因為三係一個好「good」嘅數字，如果認為「四」呢個數字好啲，有人提出四佢亦都唔mind。佢又話方案中「三、八」呢兩粒數，係出自岳飛《滿江紅》中「三十功名塵與土，八千里路雲和月」，周融果真係精忠報國嘅精英。
同場加映有喺立法會爆粗嘅民建聯大狀、幫港出聲法律顧問馬恩國，佢話公民提名違反《基本法》，認為人數多並唔代表就有廣泛代表性。成個記者會，道理就這樣給他們一一說歪了。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange