講今日推介前，先update本欄愛股佳景（703）嘅動向。公司最新通告表示，澳門投資物業已落實新租客，月租由原來嘅約120萬銀，大幅提高至240萬銀，升幅足足一倍。佳景現價年度化市盈率17倍，較本港上市餐飲股仍有一定折讓，但增長潛力肯定最強，破頂只係時間問題。
踏入新一年，又係盈喜股發圍嘅時候，梳化股敏華（1999）中午報喜後即發圍，全日爆升近一成。玩具股彩星玩具（869）去年中期賺2.1億銀，已相當於2012年全年嘅4.8倍，發盈喜可謂無懸念。
彩星玩具主打嘅忍者龜產品，對於香港人嚟講，可能唔係潮物，但其實喺美國紅透半邊天。據聞去年聖誕未到，已被搶購一空，零售商仲要急忙補貨；新一代忍者龜動畫，舊年開始喺美國播放，結果大受歡迎，今年更會上映電影版，屆時肯定會將熱潮推至高峯。除美國市場外，彩星亦積極進軍亞洲，動畫已率先登陸內地央視兒童台，一旦成功奪得強國人芳心，盈利肯定幾何級數上升。
下半年乃行業傳統旺季，保守估計盈利較上半年增長五成，則全年賺5.3億銀，市盈率即跌至9倍，一句講晒︰抵買！如果恢復派息，基金肯定瘋狂搶貨，趁好消息未出籠前上車，贏面極大。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange