兒童用品股青蛙王子（1259）去年底遭沽空機構狙擊，被質疑係「青蛙扮王子」，誇大銷售水平，一個月後好不容易復牌，股價曾企穩一陣，但好快又再急插。青蛙王子遭人「踢爆」後，核數師無立即跳船，券商無見風轉軑，甚至全都幫佢講好說話，仲有投行叫人喺3.5元撈底。
海迪同唔少朋友傾過，他們對呢隻股份睇法兩極：有部份股東（特別係歐洲基金）覺得公司肯定有問題，解釋得唔全面；但另一班主要係本地和大陸基金，反而肯收貨，相信公司終會翻身。
青蛙王子復牌後，據悉有唔同單位都曾請人去起底，根據沽空機構報告中的線索回內地查察。有人覺得青蛙王子分銷商嘅office門庭冷清，肯定有古惑；有人就走訪多間連鎖超市，見到有產品賣，覺得公司真係做緊生意。上個月有內地網站，更曾發出過一篇類似偵查報道的文章，但在數小時後即被刪除。
青蛙王子嘅真偽，海迪無足夠證據去判斷，不過就肯定唔會buy呢間公司。無論佢是真是假，單從管理層處理今次危機嘅緩慢、對市場觸覺嘅遲鈍，已經凸顯他們根本無能力去反擊外間嘅質疑和挑戰。即使估值平，可博反彈，但點能夠真心去投資一間管理層都唔掂嘅公司？近日青蛙王子嘅長期支持者里昂，都宣佈要終止對青蛙王子嘅coverage。我相信訊息已經很明顯了。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange