生於香港做怪獸家長，你冇番一定身家「做水魚」，真係好難修成正果。呢兩日網上瘋傳一張宣傳單張，題為「想讓小朋友拜年更進步？好口才工作坊」。
你冇聽錯，拜年都有堂上，話係教小朋友拜年禮義、溝通技巧、理財觀念咁。咁到底咩叫「拜年更進步」呢？菲菲唔考究。戲肉當然係講收費，工作坊分幼稚園同小學兩組，最多報讀三日，每日兩小時，收費一日盛惠280元、兩日420元以及三日500元。
見到呢張單張，菲菲頓時覺得自己賺咗。話晒菲菲由細到大，由拜年都拜山，面對親戚都應付自如，至少新年識講句「恭喜發財」，逗到利是；而清明拜山時都識背一句「清明時節雨紛紛」。唔需要上課程就已經自學成功，唔知菲菲有冇資格去做課程導師呢？
而家拜年課程要500元，如果真係有人報，分分鐘乜節日都有課程出，長玩長有，好似中秋禮儀班、盂蘭禮儀班、喪事禮儀班等。到時一個小朋友，手執嘅禮儀班證書，真係勁過「中國首善」陳光標，一定贏在起跑線。
中國人社會盛產怪獸家長，香港都已經係咁。內地有生育限制，錫到啲仔女燶更加係人之常情。所以話，做童裝「紅孩兒」嘅米格（1247）驚人超購1,125倍，真係多得一班怪獸家長唔少。
Fifi
本欄逢周二、四刊出
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24