中國籃球喺千禧年曾經有大突破，3大長人王治郅、姚明同巴特爾先後轉戰NBA，不過隨着姚明因傷退休，36歲嘅「大郅」亦都決定今季CBA季後賽完結後就會退役。但世態炎涼，八一教練阿的江宣佈大郅退休消息時，竟然只得一名記者採訪。
大郅效力嘅八一，周日主場91:109不敵姚明做老闆嘅上海，賽後記者會由上海隊先發言，當大部份嚟自上海嘅記者採訪完就走人，得番一名女記者繼續訪問已淪為弱旅嘅八一，結果八一教練、前國手阿的江對住冷清清嘅記者席宣佈：「今個賽季後，王治郅退役。」
首位中國人打NBA
其實2米16嘅王治郅，對中國球迷好有意義，因為佢係第一位出戰NBA嘅中國人，01年加盟小馬，之後打過快艇同熱火，雖然成就唔及得02年新人狀元姚明，不過都掀起一陣高佬射3分風潮；大郅對中國隊亦都係老黃忠，12年奧運、13年亞錦賽都仲幫國家隊打拼，大郅之前接受訪問時表示：「我希望退休後，每年都有一個長假期，可以揸住四驅車，帶住相機，去新疆、西藏流浪式旅行。」
由於軍方背景嘅八一，唔會聘請外援，今季常規賽戰績只得6勝18負，基本上已無緣季後賽，最後10場常規賽將係大郅最後之戰；2月16日八一主場鬥遼寧之戰，球隊仲會幫佢搞告別儀式，以告別呢位幫八一7奪CBA冠軍嘅功臣。睇番𠵱家中國男籃，連當打嘅易建聯都已經回流CBA，下個有機會再戰NBA嘅中國人，可能要等18歲新人、身高達2米17嘅周琦。
足本收睇《亂噏24》x卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24