《明報》河蟹事件呈膠着狀態，當事人劉進圖撰文表示：「在這個關鍵時候，我希望各界關注明報動向的朋友，能夠給我們多一點空間，讓公司管理層與編輯部員工有較佳的環境和氣氛，通過持續的對話，化解矛盾，走出困局，達至雙贏。」
張曉卿意圖已十分清晰，幾個月前派北美《明報》負責人呂家明空降贒實劉進圖，也毫不避忌越洋致電「關心」明報連日用HKTV發牌風波做頭版，大家試諗諗一個在遙距監控器下操作嘅總編輯，實在奇怪，更奇怪係劉進圖乃由基本法起草年代已經彈起、九十年代成名嘅資深傳媒人，一步一步爬上《明報》總編輯之位，一度係香港傳媒界典範式人物，但由北美呂家明作遙控監視，本身已係一大侮辱。而張氏家族仍未罷休收手，當然源於施壓者唔肯收貨，至於觸發點相信係HKTV發牌。心急起來把心一橫索性調走劉，由南洋商報空降一個自己人做keeper。呢種矛盾用時間可以解決，才不會。
雙方虛偽之處係扮儍詐懵，老闆掩飾調動真正原因，若無政治壓力，又何需呂家明遙距監控？劉進圖則為對方掩飾，以為可以幕後解決，實在太天真。
過去受整治之傳媒，一旦揚開晒，老闆就會抓難面，橫掂一件污兩件穢，嘈兩日就die down，一於硬上弓。由十年前封大班、毓民，一路殺到游清源、李慧玲，試問有邊個可以頂得住？所謂「定點清除」，從未有不成功，頂得最耐嗰位叫吳志森，一樣消失於港台phone in節目。
越和稀泥 讀者越流失
《明報》越和稀泥走向河蟹，傳統媒體就越加速衰落，幾年下來主流媒體歸邊河蟹，唔少人已經忍夠，索性唔睇電視新聞及報紙，越年青就走得越快。
劉進圖呼籲大家畀空間《明報》當日，中大傳播與民意調查中心就發表最新調查。調查顯示，有六成多市民每星期都睇收費或免費報紙，但透過網站和利用手機或平板電腦Apps閱報市民已經接近四成，更值得關注係18至44歲群組中超過四成用Apps睇新聞而減少閱讀收費報紙。
《明報》定位乃中產，知識分子、大專生，呢班人對政治最敏感，也最重視報紙立場。大專生階層最先流失，轉向新媒體，慢慢只會剩低一班銀髮族中產讀者，前景如何？心照不宣。
韓寒曾經講過，我們有兩種邏輯，一種叫世界的邏輯，一種叫中國的邏輯，香港係國際城市，社會大勢自然按世界的邏輯演進。
至於明報內部要按中國的邏輯去演進，我們也無法改變，當《明報》與本土中產民意越行越遠時，世界唔會停低等你回頭！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange