本港首隻夜店股Magnum（2080）招股，投資者推介會唔係例牌喺五星級酒店舉行午宴，而係收市後喺中環Magnum搞酒會，招呼一班芬佬同投資者攞正牌蒲一蒲。
Magnum主席葉茂林前日開記者會已經搵一班模特兒做人肉佈景板，噚日再搵一班高䠷外籍女模喺推介會撐場，可能避免影響金融財俊嘅形象，推介會謝絕記者內進採訪。
開舖13個月回本
據聞一班靚女模特兒喺會場內拎住Magnum size（較普遍酒瓶大約一倍）嘅靚酒，喺舞台上行貓步，跟住仲有靚女跳舞表演，宣傳夜店特色，噱頭多多。
靚女表演完之後，就到Magnum管理層發言，據聞葉茂林透露夜店好好賺，有間舖開咗13個月就回本，毛利有幾高可想而知。一班投資者睇完令人情緒高漲嘅靚女表演後，再聽主席講業務前景，係咪特別入耳呢？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange