提起內地IT界名人，大家多數只講阿里巴巴創辦人馬雲同騰訊（700）老闆馬化騰，但查實仲有一位45歲幾靚仔嘅李彥宏，佢係搜尋巨擎百度創辦人，剛被彭博富豪榜評為內地首富，噚日難得來港出席亞洲金融論壇，竟然話自己喺IT界已經過時！
李彥宏參與論壇其中一個環節，跟主持人、恒隆地產（101）主席陳啟宗作半小時深情對話，一上台，台下就有唔少嘉賓舉起手機影相，唔知仲以為係邊位明星上台，喺呢類嚴肅嘅財經論壇認真少見，可見李彥宏幾有魅力。
一向牙擦嘅陳啟宗都唔抵得對方身家豐厚，劈頭就打趣話「我喺地產界算唔錯，但做來做去，公司市值只得千多億元（百度喺納斯達克上市，市值4,900億元）。」
批Google敗於「不接地氣」
李彥宏雖然不及馬雲咁多金句，但算係快人快語，指自己北大信息管理系畢業，一心就係做科網呢行，又認為人嘅創造力喺30歲或之前最旺盛，佢已經過時，有嘅只係經驗，所以會交由年輕下屬做決定。
佢承認𠵱家內地各行各業都受到互聯網衝擊，除零售、金融，佢預期將來醫療、教育等與民生有關嘅範疇亦會受衝擊，唔單止係創造財富咁簡單，仲會對文化生活帶來重大影響。
對於騰訊、淘寶等喺內地橫行，外國科網公司冇乜位置，李彥宏認為係外國公司不接地氣（唔熟本土行情）。佢舉例，Google以「谷歌」進軍內地市場，喻意穀物豐收之歌，以為中國以農立國，仲有好多農民，但實情係，畀得起錢上網嘅人都唔關心農業，即係一開始就唔了解行情囉。
李華華
mailto:[email protected]
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24