臨近農曆年，財經界茶餘飯後話題，唔可以唔提下周三出爐嘅里昂風水指數。里昂從1992年開始公佈首份據講出奇地準確嘅猴年風水指數，至今已經22年，近幾年仲成功吸引唔少中英文媒體採訪。
不過，翻查舊年蛇年預測，無論指數抑或板塊預測，同現實都差一大截，甚至幾乎呈相反方向，投資者認真便輸了！里昂風水指數舊年11個月（新曆2月起計）嘅吉凶預測，差唔多八成估錯，佢估大市先升後跌，點知個市開波冇耐就跌畀佢睇。恒指舊年6月急挫，7月反彈，里昂就足足估遲咗兩三個月，到佢估10月開始反彈，現實就係已經完成反彈，進入牛皮市。
估錯科網股「凶」
板塊方面就更加山埃，舊年最當炒嘅科技同互聯網，居然被評為「凶」，越升越有嘅濠賭股就只係中庸嘅「平至吉」；反而最當災嘅金融股就被預測為「吉」。如果投資者喺蛇年跟住佢炒股想趨吉避凶，就會變成損手爛腳！
不過份報告都有些少亮點，就係名人運程中，有為王維基批算過，話佢「或將遭受挫折，投機能免則免」，對於免費電視發牌就要有「耐性」。王維基喺發牌一事上的確面對唔少挫折，至今都未完全撥開陰霾，里昂都叫做洞悉到少少天機咁啦！
查實每年一度嘅風水指數記者會，例必有記者問里昂點樣說服市場份報告可信，佢哋都承認風水指數旨在娛樂大家，就算未必可靠，都係想輕輕鬆鬆搞吓笑。
李華華
mailto:[email protected]
足本收睇《亂噏24》x卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24