退休大記者收到一位資深記者嘅電話，詢問呂家明是何許人也，大記者最初有啲愕然，咁樣回答：「今日蘋果頭版有大頭相嗰位呂家明？幾出名嘅喎，點解唔識呀？」但再講落去，大記者就明白資深記者最多係三十出頭，呂家明十八年前移民離開香港之時，資深記者只係十三四歲啫，係會唔識呂家明嘅，即使係四十歲左右嘅編輯，十八年前剛好大學畢業，都係唔識佢嘅啫。
記者小G對左丁山亦有此一問，明報編務董事呂家明究竟係何許人也，點解會空降香港明報？左丁山識少少啦，可以咁答：呂家明係樹仁學院新聞系畢業生，今年已年過六十，踏入退休年齡組別，佢畢業後在明報做突發記者，師從陳非，陳非在明報聞名一時，兼寫專欄，報行無人不識，得陳非指導，呂家明採訪新聞亦靈活過人，寫黃賭毒及社會新聞，簡單清楚，易讀易明，甚受讀者歡迎。明報之原始發達精神係陳非、柳聞鶯式採訪，加金庸武俠小說，並無知識分子味道，今天的記者編輯大概唔會知道。點知在八十年代末，呂家明「被辭職」，適逢壹仔創刊，總編輯梁天偉（現樹仁大學新聞系主任）於是邀請佢加盟壹週刊，負責時事組，由佢負責採訪嘅某期封面故事講澳門賭神葉漢，創下當時週刊銷量紀錄，連肥佬黎都讚佢好嘢。
呢位出色記者好快就升咗做副總編輯，但在1995年佢話要舉家移民多倫多，向肥佬請辭。去到多倫多有乜好做呢？佢向左丁山問意見，本想叫佢去多倫多星島日報碰吓運氣，點知同時聽聞多倫多明報可能有一個空缺，於是叫佢去搵于品海問吓，估唔到于品海見完佢之後，就請咗佢做多倫多總編輯，呂家明歡喜到暈，移民移得非常happy，不久之後，于品海控制之明報控股公司「智才」，因為搞中天電視台係咁燒銀紙，「智才」嘅高層無糧出，逼於無奈要出售手上最值錢嘅資產明報，由「獲多利」穿針引線，介紹張曉卿買入控股權，並由匯豐融資（梁高美懿主理）。張曉卿控制明報之後，發覺加拿大業務唔錯，同星島有得揮，於是升咗呂家明為北美主管，甚為重用，去年仲要佢兼任香港明報編務董事（原本由馬來西亞華人翁昌文擔任），左丁山都戥佢辛苦，久唔久就往返多倫多香港一次，你估仲年輕咩，不過有時人在江湖，身不由己，打工仔都係要聽老闆指令嘅啫。