香港人對食越變嘴刁，尤其對日式拉麵要求甚高，當年中學午飯食個30蚊港式拉麵已是頂級享受，家陣先後有山頭火、豚王以至一風堂和一蘭等插旗，喺中環仲有好多講唔出個名嘅拉麵舖，食好咗就好難返轉頭，究竟幾多人會翻兜中學時代那碗味千拉麵？不過唔緊要，港燦唔吼，仲有龐大的強國市場，味千中國（538）上周公佈第四季中國同店增長達10.5%，為逾一年新高。
味千中國過去在「骨湯門」和反日示威下，股價一沉百踩，但Samantha認為味千已重新出發，首先，標榜以豬骨熬製的湯底已佔少數款式，湯底更多是麻辣、酸辣、番茄、冬蔭功等，入嚟食的未必是衝着豬骨湯而來，由於湯底甚似聯合國，除了拉麵這東西之外，日本色彩已被抹得八八九九，同食譚仔冇乜分別，亦解釋安倍參拜靖國神社，味千仲有得升！
商務部早前公佈，在內需拉動下服務貿易規模創歷史新高，在肅貪下炒內需，做強國生意之餘，又要大眾化，非味千莫屬，他們在強國賣約30蚊人仔一碗拉麵，人均消費普遍少於50人仔。睇番中期純利大增1.8倍至1.3億，公司冇因此心雄，繼續縮舖，銀行結餘及現金17.4億元，相信在雙位數強國同店增長下全年成績表仍能維持強勢，上周五突破8月高位，衝上年半新高，先睇11.4元。
Samantha
本欄逢周一、三、五刊出
足本收睇《亂噏24》x卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24