問：明報撤調總編輯係機構內部運作，關你外人咩事？
答：你樓下個看更換咗人，你都會關心佢會唔會做好呢份工、把關夠唔夠落力，會唔會放啲唔三唔四嘅人入嚟㗎。用家就有權提意見啦。
問：有邊間公司換老總要得到員工同意先得㗎？
答：有邊間公司換老總換到未公布新老總個名但舊老總已經要起身咁急趕呢？若要人不知，除非收埋啲。
問：你員工唔鍾意換老細，你咪換過份工，東家唔打打西家囉？何苦屈響度？
答：你香港人唔鍾意篩選特首，你咪移民囉，何苦上街示威呢？
問：報紙係老闆私產，你理得我份報紙以後做成點啊！
答：毒奶粉都係老闆私產，你理得我罐奶粉落幾多三聚氰胺啊！
問：報紙點會等於食品安全啊？
答：食物影響健康，報紙影響精神健康；如果報紙講大話隱惡揚善，最後受害的便是市民。你說，市民有無權發聲？
問：不能先入為主未審先判，太快便說來自馬來西亞的老總會搞壞明報。
答：好啦，唔叫犯人，就叫疑犯啦。
問：明報之前都做到成嚿梁粉咁樣，仲駛乜再政治干預換老總啊，你想太多啦。
答：之前就摸手摸腳摸下巴，依家就剝晒衫褲剝晒鞋，程度有深淺、次序有先後，得寸進尺、步步進逼啊。
問：每份報紙都有自己立場㗎啦，或者明報之前係知識份子報紙，但依家想轉做喉舌報，咁咪換老總做嘢囉，有乜唔妥先啊？
答：曼聯換咗莫耶斯做領隊，踢法保守，搞到隊波一pat屎，球迷梗係要say no啦，有乜唔妥先呢？
結論：你有權轉軚，但如果你轉軚會撞向行人，我們當然有權要求你煞車停止！