中央搵林鄭主理政改，搵啱人，泛民一眾頭目，中晒招，任由林鄭造勢，趁機推銷埋自己，2017即使硬撼余若薇，一樣冇得輸。難怪今日政圈中人，紛紛認為林鄭氣息上佳，精神奕奕，與大半年前傳媒哭訴，又乾又苦之外形，判若兩人。
與林鄭角力 泛民處下風
泛民中人不少與林鄭識於微時，甚至有大學時代同學仔，加上對港英政務官出身者，仍心存幻想，所以留有一手。中國歷史上，降將永遠最心狠手辣，吳三桂降清前思想上也苦苦掙扎，寢食難安，一旦主意已決，就一往無前，吳三桂為顯忠貞，追殺南明永曆帝至雲南。特區政治，係無自由意志可言，一切由劇本決定，演員只有按劇本演出，梁振英唱到荒腔走板，換個林鄭，同一個劇本，大家聽落就順耳得多。
元旦民陣遊行，佔中三子再發動網上投票，鍾庭耀處事甩漏，靠一個電訊商，搞到短訊確認程序大塞車，好多巿民投唔到票，但最終都有六萬多人投票。翌日林鄭竟然公開否定投票，認為呢類民意冇參考價值。佢擺明係要按劇本行事，但泛民班廢柴竟然又無反應，任由佢踐踏民意，好死唔死跟住三日，仲去官邸同佢晚宴。如果泛民政客有些少骨氣、又有些少判斷力，就應立即要求林鄭收回有關言論，否則杯葛官邸飯局。
泛民政客變相幫林鄭抬橋，為乜？相對北京所賜予佢之權位、虛榮，泛民有乜嘢手上籌碼，可以令林鄭企過去自己一邊，向北京據理力爭2017真普選。林鄭由不獲梁重用，喊苦喊忽，到今日手握政改諮詢大權，要報答中央知遇之恩，只會用盡手段、個人政治資本、輿論戰，去壓制一切被視為挑戰基本法之言論，令真普聯邊緣化。如果佢成功實現中央旨意，下一屆特首，建制派仲有邊個可以同佢爭，泛民女神即使入到閘都冇得爭。
林鄭上周六落沙田第一城派傳單，good show！冇人示威抗議，對比梁振英落區，其政治能量及表現均強得多，泛民各有算盤，正中下懷，俾林鄭食到個勢，呢場角力戰，泛民好快會處下風。
而最可笑係泛民政客，仍然為林鄭抬橋，為對手累積政治資本，壯大對手實力，好等佢日後對付自己泛民，香港政客水平，沒有最低，只有更低。
市民期望泛民為香港人爭取真正普選？班友未埋牙已敗象畢呈。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange