最近《救火英雄》橫行，街上嘅四大影帝級猛男海報型到震，現實生活中嘅球壇，近日都出咗一位救人英雄，前德國國腳古蘭爾（圖）奮身勇救遇溺女子，同樣man到震。
話說巴西裔嘅古蘭爾早前返家鄉過聖誕，日前到里約熱內盧享受陽光與海灘之際，驚見中女遇溺，佢同朋友立即二話不說極速游到被困海中央嘅中女身邊，上演一幕英雄救美。31歲嘅古蘭爾救人後仲好淡定接受記者訪問：「救人完全係出於本能，當時好大浪，遇溺者身邊冇其他人，我哋冇猶豫嘅餘地，好在最後可以成功救人。」連口脗都似足紀律部隊！
古蘭爾08年因未獲正選而私自離開史浩克04，其任性兼有違球隊紀錄行為被德國踢出國家隊，仲要絕到永不錄用。久未露面嘅古蘭爾，今次憑同球場上不相伯仲嘅膽色救人，相信令不少球迷再次記起呢位被遺忘嘅球星。文：呂晨
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange