【尖沙嘴】導演彭浩翔舊年監製電影《飛虎出征》，又執導拍《香港仔》同《撒嬌女人最好命》兩部戲，真係忙到氣咳，所以今年佢喺幕後工作方面會好好休息一吓，改為專心去做演員，而上個月彭浩翔簽咗畀太陽娛樂做演員，嚟緊會同導演郭子健一齊孭飛做一部新戲男主角。
為咗令自己擔正嘅新戲多啲聲勢，彭浩翔力邀好友楊千嬅客串做番個角色，而前晚彭浩翔就專登約千嬅食飯，向千嬅落足嘴頭。
偶遇蝙蝠俠
彭浩翔前晚約咗千嬅喺尖沙嘴圓山台灣料理食飯，同行仲有佢太太同寰亞電影高層，佢哋一行人食飯食到10點半離開，咁啱有班外國人開完派對，佢哋着住蝙蝠俠衫同鐵甲奇俠造型出現，咁啱企晒喺千嬅隔籬，場面都幾有趣。千嬅同彭浩翔傾咗幾句之後就揸咗媽咪部寶馬離開，彭浩翔夫婦就自行搭的士。
噚日記者打電話畀千嬅，問佢係咪幫彭浩翔主演嘅新戲客串，佢就話：「佢（彭浩翔）話做咗咁耐導演，係時候做吓演員，所以簽畀太陽娛樂，仲話：『你幫吓我啦，喺戲度做我家姐客串吓。』我不嬲同佢都好熟，如果時間上配合到，同埋個角色承受到我都會做嘅。」
採訪、攝影：楊浩賢、畢紹基
戲裡戲外，話題最強，立即收睇《動戲場》:
http://hk.movies.nextmedia.com/extra/list/