韓劇《繼承者們》紅遍亞洲，男女主角李敏鎬同朴信惠無論去到邊都咁受歡迎。早前Miu Miu請咗朴信惠嚟香港做開幕禮嘉賓，雖然人走咗，但話題仲未完，唔少高登友都喺網上開post討論朴信惠，讚佢樣靚身材勁，令佢成為高登新寵兒。
阿徐似哈林
朴信惠當晚嘅打扮確實令人有好大驚喜，平時密密實實嘅佢，當晚着上一條超低胸裙，爆乳打扮令人睇到「嘩嘩聲」！有網友將當晚有份出席嘅女星，包括日星水原希子、朴信惠、Angelababy、徐濠縈同吳千語嘅合照，標題寫住「5個亞洲頂級美女，要邊個？」結果網友一面倒選朴信惠，仲封佢做「美胸女神」，反而阿徐就被人笑個樣有啲似哈林庾澄慶。
朴信惠都知自己呢排喺網上hit爆，有韓國傳媒報道話佢喺微博貼咗張挺胸相，搞到信惠妹妹要即刻澄清：「那不是我傳的照片，我的微博上沒有這種照片！」可能係擔心影響自己嘅清純形象。
場主：守庫
戲裡戲外，話題最強，立即收睇《動戲場》:
http://hk.movies.nextmedia.com/extra/list/