NBA上周五舉行首場花名波衫大戰，網隊同熱火鬥到雙加時，網隊憑「JJ」祖莊遜攻入32分，主場以104:95勝出，熱火前鋒「King James」勒邦占士今仗好好火，第1次加時6犯離場。
追到加時6犯離場
NBA首次准許隊衣背部印上花名，不過兩軍主力嘅花名波衫都已經流出，熱火今仗收起「D. Wade」獲迪，靠身穿「King James」波衫嘅勒邦占士孭飛，大部份時間落後之下，第4節力追，包括被網隊前鋒迪里杜域惡意犯規後，意圖向對手報復，好彩隊友拉住佢。熱火靠King James最後連取3分，法定時間逼和89平手，要加時分勝負。不過加時階段，累積36分嘅King James唔收火，最後36秒進攻犯規，要6犯離場，係佢職業生涯第3次6犯離場。
熱火頓失大將，就算第1次加時由N高爾中距離建功，追成93平手，但到第2次加時，始終係網隊天下；「JJ」中距離建功，加上「Truth」皮雅斯射入3分，網隊打出11:2擊敗熱火，取得5連勝，排名仲升上東岸第7位。博到勒邦占士進攻犯規成贏波功臣嘅利雲斯頓，賽後就話：「今仗係偉大嘅勝利，全隊都比今季之前嘅比賽出色。」
足本收睇《亂噏24》x 卓韻芝；跟住有錢國偉陪你夜蒲！
周一至周五《亂噏24》約定你： http://bit.ly/appletalk24