一位女性讀者自云唔識電郵，唔識打字，寫咗一封毛筆信，託人送嚟俾左丁山，內云：「窮則變變則通」，少時祇有木檯一張，做功課吃飯玩牌都祇有用同一張枱，有時，還會是麻雀枱，那麼小孩子便要坐在碌架床邊，當書枱用來做功課，從沒有想過要有一張書枱，也如此順利讀完了中小學。
鄰居李太，台山人，有一子一女，都在培正中學讀書，租了一間房，一家三口，就住了好幾年，直到美國移民簽證發出到美國與李先生團聚，一子一女在香港念書成績優異，到美國升學也非常順利。是時代變了，書枱便是書枱，沒有書枱便影響學習，對五十後的一代來說，像怪論。呢位讀者顯然係睇咗本欄「未必人人有書枱」之後，有感而發嘅，在1950年代出生嘅窮孩子，有書枱者係幸運一族，不少人今天已有所成，見一啲社運人士講到窮孩子冇書枱會影響學習情緒，顯然不能認同。
一位熱心50後，幼時住在深水埗貧區，而今學業事業有成，退休後熱心於青年服務，係香港青年旅舍協會主席，因投標成功，將1954年落成嘅第一代徙置區大廈──石硤尾美荷樓──改裝成為青年旅舍，佢本來平時十分低調，但為咗宣傳推廣美荷樓，不惜接受「蘋果日報」訪問，佢就係黃奕鑑，新亞會財系1977年度畢業生，與陳茂波同班。
收到上述讀者來函之日，同時收到黃奕鑑送來一本新書「美荷樓記」（作者張帝莊），張帝莊名字似曾相識，如記憶無誤，應是二十餘年前星島日報嘅記者及專欄作家，以文筆流暢見稱。
在石硤尾徙置區長大嘅兒童，應該全部冇書枱讀書，本書第45頁嘅1976年圖片就清楚顯示一個單位內只靠布簾分隔兄弟姊妹父母嘅床位，容不下一張書枱飯枱，今天之經濟日報社長麥華章生於1949年，在石硤尾度過十二個生辰，住在石硤尾木屋區木屋，上唔到樓，一家六口的家住在二百呎木屋，一半用作五金工場，一半放了一張床，一張枱，一個櫃，一個米缸，別無其他傢俬。麥華章讀石硤尾官立小學，考升中試派入皇仁（那時候沒有分區派位），考入港大，從此生命不一樣。又有一位住在深水埗的窮學生陳志海，口頭禪是「做人唔好姓賴」、「千金難買少年窮」，由一位成績普通又普通嘅學生至到成為港大法律系一級榮譽畢業生，知名大律師，讀「美荷樓記」，就知道冇書枱絕對不是藉口。